Þorvaldur Logason

Ríkjandi vald í vestrænum ríkjum.
Frægasti heimspekingur Finna: Georg Henrik Von Wright lýsti valdkerfi sem hann kallaði Tækniveldið (teknókratía) og er sambræðingur iðnaðar, vísinda og stjórnmála. Tækniveldið er vald utan og ofan þjóðríkja (lýðræðis) sem mótar og þróar þekkingu í þeim tilgangi að hámarka hagkvæmni og hagnað og eigið vald. Í tækniauðveldinu eru aðferðir kapítalískrar vísindahyggju (eða rökfræðilegs kapítalisma) allsráðandi.
Von Wright skýrir ríkjandi vald í vestrænum ríkjum eftir þeirri þekkingarfræði sem einkennir valdið; markmiðsmiðaðri tækniþekkingu, en ég vil leggja áherslu á samfélags-pólitísk og siðferðileg markmið veldisins sem hafa birst heiminum á áhrifaríkan hátt undanfarið. Tækniauðveldið er nafngift á því nýja auðvaldi nýfrjálshyggjunnar sem hefur mótað heiminn og stjórnað honum meira og minna frá 1970 og gerir enn í dag, þrátt fyrir að hafa stímt á fullu gasi á vegg í kreppunni 2008.

Hver eru einkenni Tækniauðvaldsins:
Beiting náttúruvísindalegra aðferða og útreiknings á öllum sviðum mannlegs lífs. Líka á þeim sviðum þar sem magnmælingar eiga illa við – hugtakið pósitífismi er oft notað í þessu sambanid.
Upphafning peningagildisins sem mælikvarða á velsæld og á allt sem hugsast getur (ný-klassísk hagfræði, nýfrjálshyggja)
Einstaklingshyggja, þar sem atferli einstaklingsins er gert að forsendu flestra ályktana, siðferðilegra sem og í samfélagsvísindum og í viðskiptum (psychological behaviorism, nýfrjálshyggja, ný-klassísk hagfræði)
Allsherjar vald fjármagnsins sem ryðst inn á öll svið stjórnmála, vísinda og menningar og starfar þvert á þjóðríki, ofar þeim og miklu leyti fyrir utan vald þeirra (alræði auðvalds)
Siðferðileg markaðshyggja. Meginhugmynd um skiptaréttlæti (gæða) verður að skipting gæða eigi að fara fram í gegnum viðskipti á peningamarkaði og niðurstaða þeirra viðskipta sé réttlát.
Það sem einkennir nálgun Tækniauðvaldsins á þekkingu er að hún er sögð pólitískt hlutlaus og jafnvel hlutlaus um gildi. Hún er stærðfræðileg, hlutbundin og smættandi og mótuð af risavöxnum alþjóðastofnunum og fyrirtækjum og sögð algild og engan veginn háð þeim samfélagslegu aðstæðum sem hún spratt úr eða auðvaldshagsmunum þeirra sem settu hana fram.